33 ta oliy ta’lim muassasasida “Kelajakka qadam” markazlari tashkil etildi

28.03.2025 Без рубрики 39 Просмотры

33 ta oliy ta’lim muassasasida “Kelajakka qadam” markazlari tashkil etildi

Oliy ta’lim, fan va innovatsiyalar vazirligi hamda “O‘zmilliybank” AJ hamkorligida oliy ta’lim muassasalari bitiruvchilarining bandligini ta’minlashga ko‘maklashuvchi “Kelajakka qadam” markazlarining hududiy bo‘linmalari tashkil etildi. Mazkur markazlar bugungacha jami 33 ta oliy ta’lim muassasasida ochildi.

Markazlar Toshkent shahri va respublikamizning barcha hududlaridagi yetakchi oliy ta’lim muassasalarida ish boshladi (infografika):

Toshkent shahrida – 12 ta

Hududiy oliy ta’lim muassasalarida – 21 ta

Mazkur markazlar yoshlarning kasbiy rivojlanishi, zamonaviy mehnat bozori talablariga mos malakali kadr bo‘lib shakllanishi hamda amaliy tajriba orttirish, stajirovka va ish bilan ta’minlanish jarayonlariga ko‘maklashish kabi muhim vazifalarni bajaradi.

Ushbu tashabbus Prezident qarori (https://lex.uz/uz/docs/-7386917)ga asosan amalga oshirilib, oliy ta’lim tizimi bitiruvchilarining bandligi va raqobatbardoshligini oshirish yo‘lida keng imkoniyatlar yaratadi.

O‘zbekiston Respublikasi Prezidentining

qarori

Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida

Yoshlarning bandligini ta’minlash, oliy ta’lim tashkilotlari bitiruvchilarining mehnat bozoriga integratsiyasini kuchaytirish, xususiy sektor va tijorat banklari ishtirokida kadrlar tayyorlash jarayonini takomillashtirish maqsadida:

1. Oliy ta’lim, fan va innovatsiyalar vazirligi va “O‘zmilliybank” AJning oliy ta’lim tashkilotlarining bitiruvchilarining ishga joylashtirishiga ko‘maklashishga qaratilgan quyidagilarni nazarda tutuvchi “Kelajakka qadam” dasturini (keyingi o‘rinlarda — Dastur) amalga oshirish to‘g‘risidagi taklifiga rozilik berilsin:

a) o‘z biznes g‘oyalarini amalga oshirish istagi bo‘lgan oliy ta’lim tashkilotlarining bitiruvchi bosqich talabalari uchun “O‘zmilliybank” AJ tomonidan biznes g‘oyani tayyor loyihagacha olib borish jarayonida to‘liq hamrohlik qilish, shu jumladan qulay shartlarda moliyalashtirish;

b) oliy ta’lim tashkilotlarining bitiruvchi va quyi bosqich talabalari o‘rtasida sohalar bo‘yicha ochiq tanlovlar o‘tkazish va g‘oliblarni ish bilan ta’minlashga ko‘maklashish. Bunda:

salohiyatli ish beruvchi tashkilotlar, shu jumladan yirik korxonalarning oliy ma’lumotli mutaxassislarga ehtiyojini aniqlash va mutaxassislarga qo‘yiladigan talablarni shakllantirish amaliyoti yo‘lga qo‘yiladi;

tanlov g‘oliblarini salohiyatli ish beruvchi tashkilotlar buyurtmasiga ko‘ra individual kasbiy ta’lim dasturlari asosida kasbga dastlabki tayyorlash tadbirlari moliyalashtiriladi;

individual kasbiy ta’lim dasturlarida ishlab chiqarish obyektlarida amaliyot o‘tash va chet eldagi oliy ta’lim tashkilotlarida qisqa muddatli o‘quv kurslarida qatnashish imkoniyati yaratiladi.

2. Belgilansinki:

Dastur “O‘zmilliybank” AJ tomonidan hududlarda, shu jumladan autsorsing asosida tashkil etiladigan “Kelajakka qadam” markazlari (keyingi o‘rinlarda — Markazlar) orqali amalga oshiriladi;

barcha oliy ta’lim tashkilotlari Dastur ishtirokchilari hisoblanadi va talabalarni ishga joylashga ko‘maklashish bo‘yicha Markazlar bilan hamkorlik kelishuvlarini tuzadi.

3. Dasturni amalga oshirish maqsadida “O‘zmilliybank” AJga Tiklanish va taraqqiyot jamg‘armasidan:

80 million AQSH dollari ekvivalenti miqdorida 10 yilga, shu jumladan 3 yillik imtiyozli davri bilan Markaziy bankning asosiy stavkasiga teng foizda;

20 million AQSH dollari ekvivalenti miqdorida talabalarni kasbga tayyorlash va ularning kasbiy amaliyot o‘tash xarajatlarini moliyalashtirish uchun beg‘araz asosda mablag‘ ajratilsin.

4. Oliy ta’lim, fan va innovatsiyalar vazirligi “O‘zmilliybank” AJ bilan birgalikda:

bir oy muddatda Dasturni amalga oshirish bo‘yicha uslubiy qo‘llanmalar va Markazlar faoliyatini tashkil etish tartibini tasdiqlasin;

mazkur qarorning mazmun-mohiyatini barcha oliy ta’lim tashkilotlariga yetkazish, ish beruvchilar va talabalar orasida keng yoritish choralarini ko‘rsin.

5. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2025-yil 14-fevral,

PQ-61-son